Flæðivika

Vikan 23.-27.mars er svokölluð flæðivika á unglingastigi. Þessa daga verða ekki hefðbundnir tímar samkvæmt stundaskrá heldur fá nemendur að velja hvar og hvenær þeir vilja læra.

Allar stofur verða opnar milli 8:15 og 14:00 og nemendur geta því valið sér hvar þeir vinna. Jafnframt hafa nemendur aðgang að þráðlausu neti og þeir því hvattir til að nýta sér síma, tölvur eða önnur tól vegna vinnu sinnar.

Nemendur fá áætlanir í hverri grein og þurfa að ljúka við efnið í síðasta lagi föstudaginn 27. mars. Þeir geta hins vegar ákveðið hvort þeir klári t.d. stærðfræðiáætlun strax á mánudegi eða skipti henni niður á hvern dag. Á miðvikudeginum eru þrír íþróttatímar í boði og hægt að velja einn eða alla. Þó þurfa nemendur að hafa í huga að þeir fá ekki aukatíma til að vinna önnur verkefni velji þeir alla þrjá íþróttatímana.

Sund og valgreinar halda sér að mestu samkvæmt stundatöflu. Nemendur 8. bekkjar fara allir saman í sund kl. 14

Þessi tilraun er gerð til að reyna að koma til móts við þarfir nemenda en einnig til að fá þá til að taka meiri ábyrgð á eigin námi. Einnig viljum við þróa lykilhæfni nemenda en í aðalnámskrá grunnskóla stendur:

• Ég set mér raunhæf markmið um frammistöðu og framvindu eigin náms, unnið eftir þeim og lagt mat á hvernig til hefur tekist.
• Ég skipulegg og ber ábyrgð á eigin námi með hliðsjón af hæfniviðmiðum aðalnámskrár, skipulegg og endurskoða með tilliti til mats á árangri.
• Ég nýti mér fjölbreytta miðla og hjálpartæki á ábyrgan hátt við að leita upplýsinga og til stuðnings í námi.
• Ég tek frumkvæði í námi mínu og er sjálfstæður og ábyrgur í vinnubrögðum.
• Ég nýti mér fjölbreyttar aðferðir við að miðla þekkingu minni og leikni, skoðunum, hugsunum og tilfinningum á skipulegan og skýran hátt eins og við á hverju sinni.

Í lok vikunnar mun hver umsjónahópur hitta sinn umsjónakennara og vikan metin. Áætlun hvers og eins tekin til skoðunar. Farið er yfir vinnu og skipulag.