Skólabyrjun verður með hefðbundnum hætti. Fyrsti skóladagur er næstkomandi mánudag, 22. ágúst. Nemendur í fyrsta til fimmta bekkjar mæta í skólann kl. 8:30. Nemendur í sjötta til og með tíunda bekk mæta í skólann kl. 9:30. Nemendur mæta við skólann og hitta umsjónakennara og við tekur kennsla samkvæmt stundaskrá. Við hvetjum foreldra til að mæta með börnum sínum þennan fyrsta dag.

Skrifstofa skólans er lokuð og opnar aftur 10. ágúst næstkomandi. Hægt er að nálgast upplýsingar um skólann hér á heimasíðunni.

Íslenska æskulýðsrannsóknin (ÍÆ) er rannsókn sem Menntavísindastofnun Háskóla Íslands framkvæmir fyrir Mennta- og barnamálaráðuneytið á grundvelli 12 gr. æskulýðslaga nr. 70/2007. Markmið verkefnisins er að safna gögnum um velferð og viðhorf barna og ungs fólks og gera niðurstöður aðgengilegar til að styðja við stefnumótun. Rannsóknin nær til 4., 6., 8. og 10. bekk. Könnun Íslensku æskulýðsrannsóknarinnar verður frá og með skólaárinu 2021-2022 lögð fyrir á hverju ári í grunnskólum. Könnunin var lögð fyrir í mars og apríl. Niðurstöður úr Borgarhólsskóla eru bornar saman við skóla á Norðurlandi eystra utan Akureyrar og svo landið allt.

Niðurstöður nemendakönnunar eldri nemenda á því skólaári sem nú er að ljúka liggja fyrir. Niðurstöður foreldra- og nemendakönnunar Skólapúlsins hafa ávallt verið aðgengilegar á heimasíðu skólans.

Skólaferðir eru hluti af skólastarfinu og mikið nám sem fer fram í þeim. Nemendur sjötta bekkjar fóru nýlega austur á bóginn með viðkomu í Gljúfrastofu, Kópaskeri og enduðu ferðina á Raufarhöfn. Eins og námskráin í samfélagsgreinum gerir ráð fyrir að við lok sjöunda bekkjar geti nemandi greint samhengi heimabyggðar við umhverfi, sögu, menningu og félagsstarf.

Nemendur tíunda bekkjar kvöddu skólann sinn í dag eftir tíu ára skólagöngu með skólaskírteini í hönd. Hver og einn heldur sína leið með eigin markmið og stefnu í lífinu. Skólinn óskar nemendum og fjölskyldum þeirra til hamingju og velfarnaðar á lífsins leið.

Síðastliðna daga hefur verið mikil veðurblíða á Húsavík, sól og hlý gola. Nemendur hafa notað dagana til útiveru og leikja með starfsfólki. Við settum upp vatnsrennibraut við sundlaugina í samvinnu við Slökkvilið Norðurþings. Krakkarnir fengu að ylja sér og leika í sundlauginni og við þökkum starfsfólki þar kærlega fyrir liðlegheitin. Unglingarnir fóru í belgjaslag í anda sjómannadags og hoppuðu í sjóinn við Húsavíkurhöfn í samstarfi við björgunarsveitina Garðar. GPG bauð nemendum upp á heit böð í körum sem við þökkum fyrir. Við leyfum myndunum að tala sínu máli, sjá myndir HÉR sem hirðljósmyndari skólans tók.

Skák eða tafl er borðspil þar sem tveir leikmenn spila 32 leikmönnum á borði sem skiptist í 64 reiti. Uppruni skákarinnar er ekki ljós, en líklegast þykir að saga hennar hefjist í Kína. Nútímaútgáfa skákarinnar er komin fram á 15. öld.

Drengir í níunda bekk fóru í heimsókn í Háskólann á Akureyri í dag en tilgangur heimsóknarinnar var að kynna hjúkrunarfræðinám fyrir drengjum. Verkefnið er samvinnuverkefni Jafnréttisnefndar Landspítala, Háskóla Íslands og Háskólans á Akureyri. Tilgangurinn er að kynna fjölbreytt starf hjúkrunarfræðinga með lifandi, raunhæfum og skemmtilegum hætti.

Það er ánægjulegt að sjá nemendur mæta á hjóli í skólann. Flest allir nemendur bera hjálm sem er sömuleiðis gleðilegt. Við viljum beina þeim tilmælum til foreldra að eiga samtal heima fyrir um að virða eigur annarra, s.s. hjól og hlaupahjól sem standa fyrir utan skólann. Sérstaklega að ræða hversu hættulegt það er að losa skrúfur og losa um dekk og annað í þeim dúr. Slík atvik hafa þegar komið upp.