Gjöf frá Grease

Nemendur tíunda bekkjar ásamt sóknarpresti við Húsavíkurkirkju.

Fyrir nokkru frumsýndu nemendur tíunda bekkjar leikritið Grease í leikstjórn Karenar Erludóttur. Uppsetning á leiksýningu er liður í fjáröflun fyrir skólaferðalag. Sýningin hlaut afar góða dóma og sýnt var fyrir fullum sal á öllum sýningum. Krakkana langaði til að hafa aukasýningu enda mikil eftirspurn.

Það kviknaði sú hugmynd að halda góðgerðarsýningu enda höfðu nemendur náð fjáröflunarmarkmiðum sínum fyrir ferðina í samstarfi við kennarann sinn, Nönnu Möller. Samfélagið hefur stutt vel við bakið á nemendum og vildu sýna velvilja og skila ágóða einnar sýningar til samfélagsins. Velferðarsjóður Þingeyinga varð fyrir valinu. Í morgun fóru nemendur bekkjarins ásamt kennaranum sínum til fundar við sóknarprest við Húsavíkurkirkju hvar hún tók á móti ágóða einnar sýningar að gjöf sem var 185.500 kr. sem renna í sjóðinn.