Sendu mér SMS

Tíundi bekkur á sviðinu í Gamla Samkomuhúsinu.

Nemendur tíunda bekkjar frumsýndu verkið Sendu mér SMS í Gamla Samkomuhúsinu í dag. En liður í fjáröflun þeirra er uppsetning á leikriti. Karen Erludóttir leikstýrði og í hljómsveit eru þeir Daníel Borgþórsson, Jón Gunnar Stefánsson og Ragnar Hermannsson en Daníel og Ragnar eru foreldrar í árgangnum. Sögusviðið er töðugjaldadansleikur í ónefndu félagsheimili úti á landi þar sem margar litríkar persónur koma við sögu. Tónlist og söngur er því í miklu aðalhlutverki en tengt saman með spaugi og stuttum atriðum. Höfundar verksins eru þeir Bjartmar Hannesson og Hafsteinn Þórisson.

Húmorinn og atriði vísa gjarnan til ársins 2009 og þar í kring, fullt af beittum færslum í bland við skrautlegar staðalímyndir þess tíma. Krakkarnir standa sig með sóma á sviðinu í leik og söng og við hvetjum fólk til að kíkja í Gamla Samkomuhúsið. Við viljum þakka Leikfélagi Húsavíkur fyrir samstarfið. Til hamingju með sýninguna krakkar.