Lokahátíð Stóru upplestrarkeppninnar

01.12.2025

Efri röð f.v. Anna Lísa, Liljar Þór og Sigrún Lillý
Neðri röð f.v. Baldur Freyr, Aníta Ruth og Baldvin Ási

Lokahátíð Stóru upplestrarkeppninnar fór fram í dag í Sjóminjahúsinu á Húsavík. Tólf sjöundubekkingar skólans komu saman og fluttu mál sitt fyrir gesti. Stóra upplestrarkeppnin fyrir 7. bekk hófst veturinn 1996 - 1997 með þátttöku 223 barna í Hafnarfirði og á Álftanesi. Sex árum síðar voru börnin 4579 úr 151 skóla hringinn í kringum landið. Upplestrarkeppnin er ekki "keppni" í neinum venjulegum skilningi heldur þróunarverkefni. Höfuðáherslan er lögð á bekkjarstarfið og að allir nemendur njóti góðs af.

Í fyrstu umferð voru lesnar Svipmyndir úr bókinni Strokubörnin á Skuggaskeri eftir Sigrún Eldjárn. Í annarri umferð höfðu lesarar val um hvaða ljóð þeir vildu flytja úr ljóðasafni Ólafs Jóhanns Sigurðsson. Í þriðju umferð fluttu nemendur ljóð að eigin vali.

Í fyrsta sæti var Anna Lísa Guðmundsdóttir, í öðru sæti var Liljar Þór Aldeyjar Arnþórsson og þriðja sæti skipaði Sigrún Lillý Aðalsteinsdóttir.

Í upphafi söng Arna Júlía Hallbjörnsdóttir jólalag við undirleik Tiiu Laur.

Sparisjóður Suður-Þingeyinga er helsti styrktaraðili keppninnar og þökkum við þeim kærlega fyrir samstarfið. Sömuleiðis Safnahúsinu á Húsavík. Öll sem lásu fengu bókagjöf og viðurkenningarskjal. Bókin í ár er Í belg og biðu sem er spjallbók með efni Sveins Einarssonar með örsögum, ljóðum, minningarleifrum o.fl. Fyrir verðlaunasæti hlutu nemendur peningagjöf.

Það eru sterk tengsl milli orðaforða og lesskilnings. Ein árangursríkasta leiðin til að efla orðaforða barna, og þar með málskilning, er aukinn bóklestur. Að tala við börnin okkar og lesa fyrir börnin okkar. Það er skammgóður vermir að nýta sér rafrænt afþreyingarefni til að skapa ró eða til að kveikja áhuga sem fer oft og gjarnan fram á ensku. Íslenskan er undirstaðan, saga okkar og menning, hið talaða mál með öllum sínum fögru hljóðum, sérkennum og framburði.

Við þökkum öllum lesurum og áheyrendum kærlega fyrir hátíðina í dag enda er mikill sigur að koma fram og lesa fyrir fullum sal af fólki.