Fréttir

Skólaárinu 2024-2025 er lokið hjá nemendum. Nemendur fyrsta til og með níunda bekkjar hittu kennarana sína í dag í hverskonar uppbroti. Í hádeginu var boðið í pylsupartý þó ekki væri veður fyrir grill og glens utandyra.

Íslenski fáninn blaktir við hún. Nemendur tíunda bekkjar kvöddu skólann sinn í dag eftir tíu ára skólagöngu með skólaskírteini í hönd. Hvert og eitt heldur sína leið með eigin markmið og stefnu í lífinu. Skólinn óskar nemendum og fjölskyldum þeirra til hamingju og velfarnaðar á lífsins leið.

Í lok skólaárs er skólastarf gjarnan með óhefðbundnara hætti en mikilvægt nám engu að síður. Nemendur sjötta bekkjar fóru í heimsókn í Hlyn, félagsheimili eldri borgara á Húsavík og nágrenni og spiluðu félagsvist. Vel var tekið á móti nemendum og þeim boðið upp á kökur, pönnukökur og safa. Sömuleiðis sáu eldri borgarar um verðlaun í félagsvistinni.

Húsavík er hvalaskoðunarhöfuðborg Evrópu og hingað leggja mörg leið sína til að berja hvalina augum. Í fimmta bekk höfum við verið með hvalaskóla í samstarfi við Hvalasafnið á Húsavík. Í vikunni fóru nemendur fimmta bekkjar einmitt í hvalaskoðun sem lokahnykk í vinnu nemenda með flóru og faunu.

Farþegarskipið Fridjof Nansen hafði viðkomu í Húsavíkurhöfn í fjórða og síðasta skipti þetta sumarið í vikunni. Skipið er nefnt eftir norska landkönnuðinum Fridtjof Nansen sem undirbjó sig hér á landi fyrir fyrsta leiðangur yfir Grænlandsjökul árið 1888. Skipið var smíðað árið 2016 og hentar sérstaklega vel til heimskautasiglinga. Skipið gerir út á leiðangursupplifun og vísindasmiðja er um borð.

Það er hefð fyrir því að elstu nemendur leikskólans Grænuvalla komi í Vorskóla til að undirbúa grunnskólagöngu sína. Nemendur komu í þrjá daga, fóru í íþróttatíma, könnuðu aðstæður í mötuneytinu og snæddu með yngstu nemendum Borgarhólsskóla. Nemendum var kennt eftir hugmyndafræði Byrjendalæsis og unnið með bókina Skrímsli í heimsókn. Sömuleiðis fengu nemendur nokkur stærðfræðidæmi og verkefni til að kljást við.

Samkvæmt fyrstu grein laga um Þjóðleikhúsið er það eign íslensku þjóðarinnar. Þjóðleikhúsið skal í starfsemi sinni leitast við að vekja og auka áhuga landsmanna á þessum leiklist. Reglulega býður Þjóðleikhúsið börnum á miðstigi grunnskóla í leikhús. Að þessu sinni er boðið upp á glænýja sýningu af Orra óstöðvandi, en hún byggir á geysivinsælum bókum Bjarna Fritzsonar um Orra og vinkonu hans Möggu Messi.

Nemendur fjórða bekkjar fóru í sveitaferð í vikunni. Ferðin er fastur liður í starfinu með vísan í aðalnámskrá grunnskóla um að nemendur átti sig á að þeir séu hluti af stærra samfélagi og geti sett sig inn í málefni nærsamfélagsins.

Gott veður hefur jákvæð áhrif á líkama og sál og skapar tengingu milli náttúru og andlegrar líðan. Dvöl í náttúrunni getur dregið streitu, kvíða og þunglyndi. Útivera róar hugann og minnkar álag. Auk þess getur útivera stuðlað að auknum samskiptum og félagslegum samskiptum.

Nemendur annars og þriðja bekkjar óskuðu eftir að njóta yndislestur utandyra í góða veðrinu enda einmuna gott vorveður þennan maímánuð. Haldið var í Skrúðgarðinn í faðm gróðurs hvar heyra má grasið vaxa og grænka.