Fréttir

Undanfarin haust hafa skólar hafið lestrarátök sem tengist gjarnan fyrsta lesfimiprófinu sem allir nemendur á landsvísu þreyta. Skólinn tekur nú þátt í lestrarkeppni grunnskólanna sem er ætlað nemendum fyrsta til sjöunda bekkjar og stendur yfir frá fimmtánda september og fimmtánda október. Keppnin ber nafni Svakalega lestrarkeppnin.

Nemendur fjórða bekkjar læra um eldfjallaeyjuna Ísland og nota kennslubókina Halló heimur. Þar er m.a. unnið með kort og áttir, landshluta, há- og láglendi, stærstu vötnin og hvar fólkið býr. Samhliða þessu er unnið með hnitakerfi og mælingar í stærðfræði. Þetta rímar við áherslur barnamenningarhátíðar sem fór fram á Húsavík fyrir skemmstu.

Við erum í miðri íþróttaviku Evrópu og margskonar viðburðir í tengslum við það í boði. Ólympíuhlaup ÍSÍ for fram kringum skólann í gær. Hlaupið kallaðist áður Norræna skólahlaupið og hefur verið fastur liður í skólastarfi margra grunnskóla allt frá 1984 þegar það fór fyrst fram. Með Ólympíuhlaupi ÍSÍ er leitast við að hvetja nemendur skólanna til þess að hreyfa sig reglulega og stuðla þannig að betri heilsu og líðan.

Útikennsla veitir óhefðbundin tækifæri í menntun. Námið fer þá fram utan hefðbundinnar kennslustofu, er hluti af náttúrunni eða samfélaginu hvar umhverfið er nýtt til kennslu. Líta má á námið sem reynslunám enda umhverfið sjálf, náttúra, þéttbýlisumhverfi, landslag o.fl. grundvöllur kennslunnar.

Sveppatínsla er bæði skemmtileg og gagnleg. Hún krefst hinsvegar þekkingar enda eru sveppir fjölbreyttir, ýmist bragðgóðir og næringaríkir eða þeir sem valda meltingartruflunum og banvænir. Þá er mikilvægt að greina þar á milli.

Við höfum opnað nýja vefsíðu fyrir verkefnið Lítil skref á leið til læsis í samstarfi við Grænuvelli. Verkefnið er samstarfsverkefni leik- og grunnskóla á Húsavík í samvinnu við Miðstöð skólaþróunar við Háskólann á Akureyri. Verkefnið snýst um að byggja brú milli skólastiga og styðja við læsisnám barna frá leikskóla yfir í grunnskóla. Núna hafa nýjir nemendur og foreldrar bæst í hópinn.

Það er árviss viðburður að nemendur skólans fari í lengri eða skemmri gönguferðir og njóti útiveru með skipulögðum hætti í upphafi hvers skólaárs. Verkefnið er liður í að fagna degi íslenskrar náttúru sem er haldinn 16. september ár hvert. Markmið göngudagsins falla vel að grunnþáttum menntunar í heilbrigði og velferð en þar er lögð áhersla á að leiðbeina nemendum um að temja sér heilbrigða lífshætti og ábyrga umgengni við líf og umhverfi. Markvisst hreyfiuppeldi leggur grunn að líkamlegri, andlegri og félagslegri færni nemenda. Við gripum veðurblíðu vikunnar daginn fyrir höfuðdag en samkvæmt gamalli veðurtrú bregður vanalega veðráttu á þeim degi og helst hin sama í 20 daga.

Það er ánægjulegt að sjá nemendur mæta á hjóli í skólann. Flest allir nemendur bera hjálm sem er sömuleiðis gleðilegt. Við viljum beina þeim tilmælum til foreldra að eiga samtal heima fyrir um að virða eigur annarra, s.s. hjól og hlaupahjól sem standa fyrir utan skólann. Sérstaklega að ræða hversu hættulegt það er að losa skrúfur og losa um dekk og annað í þeim dúr.

Börn bregða á leik, spark í bolta, hlátrasköll og heljarstökk á ærslabelgnum. Já, nýtt skólaár er hafið og skólinn iðar af lífi. Hér eru öll í mismunandi störfum og hafa sín hlutverk. Við erum öll hluti af skólasamfélaginu. Það er alltaf sérstakur dagur að koma saman á fyrsta degi, spennt, forvitin og kannski smá kvíðin að hefja nýjan kafla í skólasamfélaginu. Þetta er ný byrjun, ný tækifæri, nýjir vinir og nýjar áskoranir.

Tilveran kemst nú í fastari skorður og skólastarf að hefjast. Skólabyrjun er með nokkuð hefðbundnum hætti. Fyrsti skóladagur verður næstkomandi fimmtudag kl. 9:00 fyrir nemendur 1. – 4. bekkjar og nemendur 5. – 10. bekkjar mæta í skólann kl. 10:15. Við ráðgerum að hefja skólastarfið utandyra við eina inngang nemenda í skólann, við gamla inngang að sunnanverðu. Öll munu ganga inn um þann inngang í upphafi skólaárs vegna framkvæmda.