Fréttir

Í myrkri sjást gangandi og hjólandi vegfarendur illa þrátt fyrir götulýsingu og ökuljós bifreiða og er notkun endurskinsmerkja þess vegna nauðsynleg. Endurskinsmerkin eiga að vera sýnileg og er best að hafa þau, fremst á ermum, hangandi meðfram hliðum eða á skóm eða neðarlega á buxnaskálmum. Þá virka endurskinsmerkin eins og blikkljós þegar ljós skín á þau.

Nemendur tíunda bekkjar fara reglulega í skólaheimsóknir og fá skólakynningar. Nýlega fóru nemendur til Akureyrar til að skoða Menntaskólann á Akureyri og Verkmenntaskóla Akureyrar. Sömuleiðis fóru nemendur í heimsókn á heimavistina þar.

Alþjóðlegur baráttudagur gegn einelti. Í þjóðarsáttmála sem undirritaður var þann 8. nóvember 2011 segir: „Við ætlum að vera góð fyrirmynd og leggja okkar af mörkum til þess að vinna bug á því samfélagslega böli sem einelti er“. Allir dagar eiga að vera gegn einelti en þessi dagur minnir okkur sérstaklega á hvílíkt böl um ræðir, sem ekki er eingöngu bundið skólum heldur samfélaginu öllu.

Skólinn okkar er ansi stór bygging. Í honum nema og starfa um 380 einstaklingar. Á honum eru fimmtán útgangar. Það er mikilvægt að nemendur og starfsfólk æfi viðbrögð við hvers konar vá. Nýlega var haldin brunaæfing og rýmingaráætlun virkjuð í samstarfi við Slökkvilið Norðurþings.

Skólinn tekur venju samkvæmt þátt í verkefninu Jól í skókassa. Það markar gjarnan upphaf jólanna í skólanum. Það eru KFUM og KFUK samtökin sem halda utan um verkefnið. Verkefnið er alþjóðlegt og felst í því að fá börn jafnt sem fullorðna til þess að gleðja önnur börn sem lifa við fátækt, sjúkdóma og erfiðleika með því að gefa þeim jólagjafir. Gjafirnar eru settar í skókassa og til þess að tryggja að öll börnin fái svipaða jólagjöf er mælst til þess að ákveðnir hlutir séu í hverjum kassa.

Ketill flatnefur hét maður son Bjarnar bunu. Hann var hersir ríkur í Noregi og kynstór. Hann bjó í Raumsdal í Raumsdælafylki. Það er milli Sunnmærar og Norðmærar. Þannig hefst Laxdæla saga. Sagan segir frá landnámi Auðar (Unnar) djúpúðgu í Dalasýslu, fólki sem með henni kom og afkomendum þeirra, sem margir bjuggu í Laxárdal og dregur sagan nafn af því. Helstu persónur sögunnar eru Guðrún Ósvífursdóttir og frændurnir og fóstbræðurnir Kjartan Ólafsson og Bolli Þorleiksson og hvernig mál þróuðust með slíkum hætti að Bolli sveik Kjartan og gerðist síðar banamaður hans.

Áhrif mannfólksins á umhverfið eru óumdeilanleg þótt þekking til að mynda á dreifingu mengunar og áhrifum hennar á lífverur sé langt því frá fullkomin. Umhverfisvandamál eru heldur ekki ný af nálinni en strax í iðnbyltingunni í Bretlandi, undir lok 18. aldar voru stræti stórborganna breikkuð svo gustaði betur um og minna bæri á menguninni.

Í Borgarhólsskóla er um 6% nemenda sem eru af pólskum uppruna þar sem annað eða báðir foreldrar eru frá Póllandi. Á síðasta ári hafði pólska sendiráðið frumkvæði að því að þeim nemendum skólans bauðst pólskukennsla á skólatíma. Fyrir skömmu kom pólski sendiherrann í heimsókn ásamt pólskukennara frá Akureyri.

Fyrir nokkru fékk hver nemandi í áttunda, níunda og tíunda bekk chromebook fartölvu afhenta til að nota við nám sitt. Tölvur hafa á undanförnum árum sannað gildi sitt í skólastarfi og mestu jákvæðu áhrifin verða þegar hver nemandi hefur sitt eigið tæki. Með því að nota tölvu í námi er vonast til að nemandi hafi meira val um hvernig hann vinnur verkefni og að námið verði skemmtilegra og fjölbreyttara og að hann geti lært á þann hátt sem hentar honum best.

Í upphafi skólaárs var stofnað læsisteymi við skólann sem hefur það að markmiði að hvetja til lesturs og vekja áhuga á bókum og lestri. Í októbermánuði var ákveðið að efna til lestrarátaks sem tengist Hrekkjavöku og Veturnóttum. Foreldrar eru hvattir til að gefa sér gæðastundir til lesturs með börnum sínum nú sem endranær. Slökkvilið Norðurþings gaf skólanum lítil vasaljós til að nota við vasaljósalestur.