Fréttir

Blakíþróttinni hefur vaxið ásmegin á Húsavík. U17 ára landslið Íslands í bæði karla- og kvennaflokki keppa á NEVZA mótinu í Ikast í Danmörku. Sjö af 25 leikmönnum liðanna koma úr Völsungi og þar af tveir núverandi nemendur skólans, þeir Aron Bjarki Kristjánsson og Hörður Mar Jónsson.

Unga fólkið stendur sig víða vel. Nemendur skólans hafa farið á úrtaks- og landsliðsæfingar og valin til að keppa fyrir land og þjóð. Alekss Kotlevs, nemandi í níunda bekk hefur iðkað knattspyrnu með Völsungi í mörg ár. Hann var valinn í U15 hóp fyrir UEFA Development Tournament. U15 landsliðið hefur keppt tvo leiki og sigraði Lúxemborg í gær en síðasti leikur liðsins fer fram á sunnudag gegn Slóveníu en mótið fer fram þar.

Undanfarin ár hafa nokkrar ömmur og afar komið reglulega í heimsókn í skólann ýmist til að lesa fyrir nemendur eða hlýða á lestur nemenda. Við tölum um lestrarvini skólans. „Þetta er sjálfboðaliðastarf og kunnum við þeim bestu þakkir fyrir“, segir Þórgunnur skólastjóri og bætir við að þetta sé aukin þjónusta við nemendur.

Stærðfræðin hefur frá því sögur hófust verið mikilvægur hluti menningarinnar. Verkefni stærðfræðinnar eru að finna, skapa, tjá og útskýra hvers kyns regluleika, lögmál, kerfi og mynstur. Hún er þannig ein af mikilvægum leiðum mannsins til að skapa merkingu og skilja náttúru og samfélag.

Loftslagsbreytingar og auðlindanýting eru hugtök sem hafa mikil áhrif á kennslu samtímans. Í hæfniviðmiðum aðalnámskrá grunnskóla í náttúrufræði er meðal annars fjallað um að nemandi geti lýst dæmum af áhrifum af gjörðum mannsins á náttúru og manngert umhverfi í heimabyggð og á Íslandi, sagt frá hugsanlegri þróun í framtíðinni. Sömuleiðis að geta gert grein fyrir notkun manna á auðlindum og dregið ályktanir af tilgangi flokkunar úrgangs.

Leikhópurinn Stertabenda, í samstarfi við Þjóðleikhúsið, sýndi leikritið "Góðan daginn, faggi" í Gamla Samkomuhúsinu. Öllum nemendum í 9. og 10. bekk skólans og nærsveita Húsavíkur var boðið að sjá sýninguna án endurgjalds.

Heimspekingurinn Aristóteles taldi að einhugur og sameiginlegt gildismat væri forsenda vináttunnar og raunar undirstaða réttláts samfélags því „vinátta virðist halda saman borgríkjum“. Fornmenn skildu reyndar vináttuhugtakið í mun víðara skilningi en við gerum. Aftur á móti taldi heimspekingurinn Epikúros að vinátta væri á endanum ánægjuvinátta af því að hún byggði á ánægjunni sem af henni hlytist.

Stærðfræðikennsla hjá unglingunum hefur verið með fjölbreyttu sniði í upphafi skólaárs. Við höfum notað þetta góða haust enda besta sumar það sem af er ári. Nemendur í áttunda bekk voru að læra um hringi og hyrninga og nemendur níunda bekkjar að læra um talnamengi.

Hundruð þúsunda voru saman komin í miðborg London í dag þegar Elizabeth II englandsdrottning var jarðsungin í Westminister dómkirkjunni. Forseti Íslands hafði á orði að stundin hafi verið hátíðleg en hann var fulltrúi íslensku þjóðarinnar á útförinni en um 500 erlendir þjóðarleiðtogar og fyrirmenni voru viðstödd athöfnina en um tvö þúsund einstaklingar voru þar samankomin. Athöfnin væri ekki hvað síst söguleg enda hefur Elizabeth ríkt sem drottning Bretlands síðan árið 1952.

Um 8% íbúa Íslands eru frá Póllandi. Í Borgarhólsskóla er um 6% nemenda sem eru af pólskum uppruna þar sem annað eða báðir foreldrar eru frá Póllandi. Á síðasta ári hafði pólska sendiráðið frumkvæði að því að nemendum skólans bauðst pólskukennsla á skólatíma. Borgarhólsskóli hefur hug á að viðhalda því verkefni og tryggja nemendum pólskukennslu í samstarfi við kennara frá Akureyri.